Place to React

2009-09-17T12:40:00.037+05:30

ఒక వ్యక్తి తన బంధువర్గంలోని మరొకరిని అణగదొక్కడానికి, తన అదుపులో ఉంచుకోవడానికి తన శక్తిని దుర్విని యోగ పరచడాన్ని గృహ హింసగా పరిగణిస్తారు. శారీరక హింస, లైంగిక దాడి, లైంగిక వేధింపులు భయపెట్టడం, మానసికంగా కించపరచడం, అవమాన పరచడం, ఎదుటి వారిని పనికిరానివారిగా, నిరుపయోగమైన వారిగా భావించేలా చేయడం, వారి వద్ద ధనం లేకుండా చేయడం, ఇంటి నుంచి బయటకు వెళ్ళకుండా చేయడం, నిర్భం ధించడం, సామాజికంగా వారిని ఒంటరిని చేయడం, భ్రూణ హత్యలు, వరకట్న వేధింపులు, వరకట్న హత్యల వంటివన్నీ గృహహింసలో భాగమే. ఇవిమాత్రమే కాదు, యజమానిగా తన అధికారాన్ని దుర్వినియోగం చేయడం కూడా గృహహింస పరిధిలోకే వస్తుంది.

సాధారణంగా గృహాల్లో గృహిణులు, పురుషులు ఇరువురూ వివిధ రీతులో్ల గృహహింస బారిన పడుతున్నా, ఈ పురుషాధిక్య సమాజంలో మహిళలే ఎక్కువగా గృహహింస బాధితులవుతున్నారు. ఒక ఇంటి వాతావరణంలోకి గృహహింస ఏదో ఒక రూపంలో ప్రవేశించిందంటే ఆ ఇంటిలోని పిల్లలు కూడా బాధితుల జాబితాలోకి చేరుతున్నారు. పిల్లలు నిరాదరణకు గురవడం, దెబ్బలు, తిట్ల బారిన పడడం వంటివి ఎదుగుతున్న పిల్లల జీవితా లకు పెనుశాపాలౌతాయి. గృహహింసకు ప్రత్యక్ష ప్రేక్షకులైన పిల్లలు మానసికంగా దెబ్బతినడం, ఆత్మవిశ్వాసం కోల్పోవడం, పిరికివాళ్ళుగా, కోపధారుగా తయారవడం, ప్రతి విషయంలోనూ న్యూనతకు గురవడం మనకు ప్రధానంగా కనిపిస్తుంది. అలాగే పిల్లలు యజమాని (సాధారణంగా తండ్రిని)ని అనుకరించడానికి ప్రయత్నించడం జరుగుతుంది.

గతంలో గృహహింసకు వ్యతిరేకంగా పోరాడే న్యాయ పరిరక్షణ బృందాలు, నేరపరిశోధక విభాగాలు, సామాజిక సేవా సంస్థల మధ్య పరస్పర అవగాహన ఎంతో సంక్లిష్టంగా వుండేది. అయితే గడచిన రెండు దశాబ్దాలుగా వారి చర్యలను

సమర్ధవంతంగా ప్రజల్లోకి తీసుకువెళ్ళడంలో గణనీయమైన వృద్ధిని సాధించారు. గతంలో గృహహింస కేసుల్లో విచా రణ సంప్రదాయబద్ధంగా వుండేది. విచారణలో గోప్యతకు ప్రాధాన్యత ఇచ్చేవారు. పోలీసు అధికారులు, ప్రభుత్వం, ఇతర సాంఘిక సేవా సంస్థలు కుటుంబ వ్యవహారాల్లో జోక్యానికి అయిష్టత చూపారనే చెప్పాలి. తమ వద్దకు వచ్చిన కేసులు క్రిమినల్ కేసులు పెట్టదగిన స్థాయిలో వున్నా, కౌన్సిలింగ్ నిర్వహించి పంపించేవారు. అయితే ఈ మధ్య కాలంలో రక్షణ వ్యవస్థ, న్యాయ వ్యవస్థ, ఫెమినిస్టు గ్రూపులు చేస్తున్న పోరాటాలు బాధితులకు సత్వర న్యాయాన్ని అందించడంలోనూ, గృహహింసను ఎత్తి చూపడంలోనూ గణనీయమైన ప్రగతిని సాధించాయి. గృహహింస సమాజా నికి పట్టిన వ్యాధిలా భావిస్తున్న ప్రభుత్వాలు ప్రపంచ వ్యాప్తంగా వ్యాధి నిర్మూలనకు భారీ ప్రయత్నాలు చేస్తు న్నాయి. మానవజాతిలో తలెత్తిన ఈ వ్యాధిని నిర్మూలించేందుకు ప్రపంచవ్యాప్తంగా ప్రభుత్వ, ప్రభుత్వేతర, సామాజిక సంస్థలు తీవ్ర కృషి చేస్తున్నాయి. సున్నితమైన ఈ సమస్యను పరిష్కరించడానికి మరింత వాస్తవ దృక్పధంతో నడుం కట్టాయి. అమెరికా, బ్రిటన్, కెనడా, భారత్ లతో పాటు ప్రపంచంలోని పలు దేశాలు ఈ సమస్యపై దృష్టిపెట్టి పురోగతి సాధిస్తున్నాయి.

మన దేశ రాజధాని ఢిల్లీలో సాక్షి సంస్థ గృహహింస బాధిత మహిళలు, పిల్లలకు లైంగిక దాడి, లైంగిక వేధింపులు, చిన్న పిల్లలపై లైంగిక అత్యాచారాలు వంటి విషయాల్లో సాయం అందించడంతో పాటు, లైంగిక వేధింపులపై 1997లో సుప్రీం కోర్టు ఇచ్చిన మార్గదర్శకాల అమలుపై దృష్టి వుంచి పోరాడుతుండగా, వుమెన్స్ రైట్స్ ఇనిషియేటివ్ సంస్థ అధికార యంత్రాంగంతో కలసి గృహహింస బాధితులకు న్యాయ సాయాన్ని అందిస్తుంది. ఇక వాణిజ్య రాజధాని ముంబైలో మజ్లిస్, స్వాధర్ లాంటి సంస్థలు, చెన్నైలోని స్నేహ, బెంగుళూరులో విమోచన గృహహింస సంబంధిత విషయాలపై పోరాటాలు చేస్తున్నాయి. ఒక గృహహింస కేసులలోనే కాక, కౌన్సిలింగ్ నిర్వహణ, బాధితులకు విద్య అందించడం, ఉద్యోగ అవకాశాల కల్పన వంటి వాటిలో సైతం విశేష కృషి చేస్తున్నాయి. ఇక కోజికోడ్ లోని అన్వేషి సంస్థ మరో అడుగు ముందుకు వేసి బాధిత మహిళలకు మెడిటేషన్ సెంటర్, ఉపాధి కల్పన కేంద్రాలను నడుపుతోంది. కొల్కత్తాలోని సోషియో లీగల్ ఎయిడ్ అండ్ ట్రైనింగ్ సెంటర్, ప్రగతిషీల్ మహిళా మంచ్, స్వయం వంటి సంస్థలు కూడా తమ విశిష్ఠ సేవలను బాధితులకు అందిస్తున్నాయి.

గృహహింస పర్యవసానాలు సమాజం మీద భయంకరమైన సుదీర్ఘ దుష్ర్పభావాలను చూపుతాయి. ఆ ప్రభావాలను మనం ఒక గజం బద్దతో కొలవలేము. గృహహింస పర్యవసానం జీవితంలోని ప్రతి మలుపులో ఎదురవుతుంది. దీనిని మనం మానవ నేత్రంతో చూడలేము. గృహహింస ఒక వ్యక్తినే కాక వ్యవస్థను కూడా ఆర్ధికంగా నాశనం చేస్తుంది. దెబ్బతిన్న వ్యక్తి జీవితాన్ని రూపాయలతో కొలవలేము. కానీ ఆ వ్యక్తి చికిత్స కోసం చేసే ఆసుపత్రి ఖర్చులు ఒక కుటుంబ ఆర్ధిక వ్యవస్థను దెబ్బతీస్తాయి. కుటుంబం అనే ఒక సూక్ష్మప్రపంచం సమాజానికి ఒక మొదలైతే, ఆ కుటుంబంలో ఏర్పడ్డ అలజడి రానున్న తరాలపై పడుతుంది. ఈ అలజడులు సముద్రపు అలల్లా కొన్ని తరాల వరకు ప్రవహిస్తూ సమాజాన్ని పీడిస్తూనే వుంటాయి. కొన్ని వేల గంటల సమయం, ఆరోగ్య సేవకులు, న్యాయ అధికారులు, కోర్టులు, సమాజ సేవకులు చేసే కోట్లాది రూపాయల ఖర్చు అన్నీ అనవస రమైనవే. గృహహింస వల్ల ఉద్యోగుల హాజరు కుంటుపడుతుంది. అందువల్ల ఉత్పత్తి సామర్ధ్యం తగ్గిపోతుంది. దీర్ఘకాలంలో అది ధేశ జిడిపిని దుబ్బతీస్తుంది. గృహహింసను నిర్మూలించడం వల్ల దేశ ప్రగతిలో గణనీయమైన పురోగతి కనిపిస్తుంది.

గృహహింస కుటుంబాలలోకి ప్రవేశించడానికి మొదటి కారణంగా వరకట్నాన్ని మనం పేర్కొనవచ్చు. అన్ని దేశాలలో దాదాపుగా అన్ని మతాలలో వివిధ రూపాల్లో, వివిధ ఆచారల్లో సమాజాన్ని పీడిస్తున్నది ఈ వరకట్న భూతం. వరకట్నం కోసం నవ వధువులు మంటల్లో మాడి మసి అవుతారు. ఆడపిల్లలు అమ్మ కడుపులో వుండగానే హత్య చేయబడతారు. ఈ పరిణామాలు ఇండియన్ పీనల్ కోడ్ 498 ఎ సెక్షన్ కు ఊపిరి పోశాయి. ఈ చట్టం కింద నేరస్తులను కఠినంగా శిక్షించవచ్చు. కొంతవరకు ఈ చట్టం మంచి ఫలితాలనే ఇచ్చిందని చెప్పాలి. దేశ వ్యాప్తంగా చట్టం చేస్తున్న కృషి, వివిధ సంఘాలు చేస్తున్న ఉద్యమాలు సమాజంలో వరకట్నానికి వ్యతిరేకంగా మంచి ఫలితాలను ఇస్తున్నాయి. అయితే మొదట ఉన్నత వర్గాల్లో మొదలైన ఈ వరకట్న ఆచారం ఆ తరువాత అన్ని వర్గాలకూ పాకి అది విశ్వవ్యాప్తమైంది. కఠిన చట్టాలు ఎన్ని వున్నా సమాజపు మూలాల్లో ప్రవేశించిన ఈ వరకట్న వేరు పురుగుకు మంచి మందు ఇంకా వెతకాల్సి వుంది.

గృహహింస సాధారణంగా ఆ ఇంట్లోని పిల్లలపై విపరీత ప్రభావాన్ని చూపిస్తుంది. నెప్పులతో బాధపడుతుండడం, నిద్రలో పక్క తడపడం, ప్రశాంతంగా నిద్రపోలేక పోవడం, విపరీతమైన కోపం, అతి పిరికితనం, యుక్త వయస్సు వస్తున్నప్పటికీ మరీ చిన్న పిల్లల్లా ప్రవర్తించడం వంటి లక్షణాలను గృహహింస బాధిత పిల్లల్లో చూడవచ్చు.

ఇందరి జీవితాలను, సమాజాన్ని పట్టి పీడిస్తున్న ఈ భయంకర రోగానికి మందు లేదా అంటే ఈ రోగాన్ని పూర్తిగా మాయం చేయలేమన్న సమాధానమే వస్తుంది. గృహహింస నాలుగు గోడల మధ్య వ్యవహారంగా కాక, సమాజానికి కీడైన అంశమని గుర్తించి న్యాయసంస్థలు, చట్టాలు నేరస్తులను కఠినంగా శిక్షించని రోజున చిన్నవాళ్ళు, బలహీనులు శారీరకంగా, మానసికంగానే కాక అన్ని రకాలుగా హింసించబడుతూనే వుంటారు. అయితే మొత్తం సమాజం ఈ గృహహింసను సహించడానికి ఇకపై సిద్ధంగా లేమని ప్రకటించిన రోజున, అంతగా మార్పు చెందిన రోజున, ప్రపంచంలోని ప్రతి మనిషికి వారి వారి హక్కులుంటాయని ఎదుటివారు గుర్తించిన రోజున రోగం నయమవడం ప్రారంభమవుతుంది. ఆ వెలుగుల కోసం ఎదురు చూద్దాం.

2009-09-16T17:17:00.006+05:30

ఒక చిట్టి పావురం తన ప్రయాణంలో అలసిపోయి విశ్రాంతి కోసం ఒక చెట్టు కొమ్మను ఎంచుకుంది. పైగా, ఆహారం కూడా అందుబాటులో వుంది. రోజంతా కదలకుండా ఆనందంగా గడచిపోతుంది. జీవితమంటే అదే కాదు. అదే ముగింపు కూడా కాదు కదా ! ఒక రోజు వేటగాడు వచ్చి పక్షులను పట్టుకోవడానికి వల వేశాడు. ప్రమాదాన్ని గ్రహించిన పావురం ఎగిరిపోవాలని ప్రయత్నించింది. అప్పుడు గుర్తించిందా పక్షి... సుఖమైన జీవన విధానానికి అలవాటుపడ్డ తాను ఎగరడమే పరచిపోయానని. విలపిస్తే వల కరుగుతుందా ? వేటగాడు కరుణిస్తాడా ?

ఫెమినిజమంటే అంతులేని సుదీర్ఘ పోరాటమా ? పేజ్-3 పార్టీల్లో రంగు నీళ్ళతో తడుస్తున్న గొంతుకలకు ఒక అందమైన చర్చనీయాంశమా ? లేక ఆర్టీసీ బస్సుల్లో 20 సీట్ల కేటాయింపుతో తృప్తిపడుతున్న ముగింపా ? ఫెమినిజమంటే రంగు చీరల ధగధగల మధ్య నియాన్ లైట్ల వెలుతురులో, నిరంతర వార్తా స్రవంతుల్లో గొంతు చించుకునే ఆవేశమా ?
ఒక బస్సులో లేడీస్ సీట్ మనం చర్చనీయాంశంగా చేసుకుంటే, ఇందులోని సహజమైన విషాదాలు మనకు నవ్వు తెప్పించక మానవు. ఒక మగవాడు లేడీస్ సీట్లో కూర్చుంటే ఆడవారు బస్సు ఎక్కగానే అతడు లేచి నిలబడాలి. ఎందుకంటే అది లేడీస్ సీట్. మరో లేడీస్ సీట్ ఖాళీగా వున్నా ఆ మగవాడు లేవకుండా వుండలేడు. ఎందుకంటే ఆ జనం మధ్య ఫెమినిజం గొంతు విప్పుకుంటుంది. తమ హక్కుల చరిత్రను వినిపిస్తుంది. అదే బస్సులోకి ఓ వికలాంగుడు ఎక్కి నిలబడితే ఏ లేడీస్ సీటు ఖాళీ అవదు. అతనికి సీటు దొరకదు. ఎందుకంటే ఆ వికలాంగుడి హక్కులు ఫెమినిజం చట్రాల మధ్య లేవు కదా!
నేను ఒప్పుకోవలసిన, చెప్పుకోదలచిన వాస్తవాలింకా చాలానే మిగిలి వున్నాయి. అప్పుడే నాపై ఫెమినిజం వ్యతిరేకి అన్న ముద్ర వేయకండి. నిజమే! అప్పుడే పుట్టిన ఓ ఆడ పసిబిడ్డను శత్రువుగా చూసి తమ కరకు హస్తాలతో హత్య చేసిన రోజులను, ఒక్క ఇంట్లో పుట్టిన ఇద్దరు పిల్లలలోని ఒక మగ పిల్లవాడు చదువుకోవడానికి బడికి వెళ్ళిన వేళ, ఆడపిల్ల ఇంట్లో అంట్లు తోమిన రోజులను తలచుకుంటే కన్నీళ్ళ వెచ్చదనం చెంపలకు, ఉప్పదనం పెదాలకు తగులుతుంది. అయినా అది గతమేగా, వర్తమానాన్ని మేము మార్చేశాముగా ! ఆహా క్షణం పాటైనా భ్రమ ఎంత అందంగా వుంది.
ఓ రైలు ప్రయాణంలో పలుకరించిన తోటి ప్రయాణీకుడు చెప్పాడు తనకు ఎనిమిది మంది ఆడపిల్లలని. అదేంటని అడిగితే మగపిల్లాడి కోసం ఎదురు చూస్తున్నానని. నిజమే, సమూహంగా మహిళలు సమానత్వాన్ని సంఖ్యలో సాధించినట్లే వున్నారు. కానీ, అణగదొక్కబడి, నొక్కబడి, పీడించబడుతున్న సమూహంగా మిగిలిపోతున్నారు. మరి దానికి మందేమిటి ? ఖచ్చితంగా ఫెమినిజమే. ఈ శతాబ్దంలో మహిళలు అందిపుచ్చుకున్న బ్రహ్మాస్త్రం ఫెమినిజం. సమాజంలో సమంగా వున్న జీవి సమానత్వపు హక్కుల కోసం ఎక్కుపెట్టిన ఆయుధం, బానిసత్వపు సంకెళ్ళని ఛేధించడానికి పైకెత్తిన పరశువు.
ప్రపంచ వ్యాప్తంగా అనేక దేశాల్లో, నగరాల్లో ఒక జాతిలో సమ భాగమైన మహిళల పట్ల పెచ్చరిల్లిన హింస, ఆకాశమే హద్దుగా విజృంభించిన పురుషాధిక్యత ఆడ జాతిని అణగదొక్కినప్పుడు బాధితుల వేయి గొంతులు ఒక్కటై నినదించాయి. అలుపులేని పోరాటాలు సాగించాయి. సాధించాయి. నిజం. వారు హక్కులను సాధించారు. ఈ రోజు ప్రపంచంలో ఎక్కడ చూడండి మహిళలకు సమానావకాశాలు. ఆకాశంలో సగం ఆమె. విద్య, ఉద్యోగాలు ఎందులో చూసినా ఆమెతో పోటీ. సామాజిక, ఆర్ధిక అంశాల్లో ఆమె ముందడుగు వేసింది. ఫెమినిజం విజయం సాధించింది. అంతేనా ? అయిపోయిందా ? లేదు. ఇక్కడే అంతా సాధించామన్న భ్రమలో, చెట్టుమీది పావురాయి స్థితిలో ఫెమినిజం పక్కదారి పట్టింది. వల వేసే వేటగాళ్ళను మరచినట్లుంది. ఫెమినిజం ఒక ఆభరణంలా మారింది. తన ప్రాథమికమైన విస్రృత దృక్ఫథాన్ని కోల్పోయింది. విస్రృత స్థాయిలో మహిళల హక్కుల కోసం కాకుండా తమ హక్కులను అనుభవించడానికి, తన హక్కులను సాధించుకోవడానికి మాత్రమే పరిమితమైనట్లు కనిపిస్తుంది. అసహజ న్యాయం నిస్సిగ్గుగా రెక్కలు విప్పుకుని మానవత్వానికి, మహిళలకు వ్యతిరేకంగా విహరిస్తున్న విషయాన్ని ఆధునిక ఫెమినిజం గమనించడంలో విఫలమైంది. ఇక్కడ ఫెమినిజం ముందుచూపు మందగించింది. నా వ్యాఖ్యలు మీకు కోపాన్ని, అసహనాన్ని కలుగజేస్తున్నాయి కదూ ? అంతకు ముందు మీరొక నిజం చెప్పండి. నిజంగా స్ర్తీలు పురుషులతో సమానంగా హక్కులను సాధించారా ? పేజ్-3 మహిళలను పక్కనపెట్టి, ఒక సామాన్య మహిళ లేదా గృహిణి ఏ హక్కుల గురించి తెలుసుకుందో చెప్పండి. ఒక సామాన్య పురుషుడికి మీరు సాధించిన విజయాల గురించి, తన బాధ్యతల గురించి ఎంతవరకు తెలుసో, ఎంతవరకు తెలుసుకున్నాడో చెప్పండి. లేదు. అతను ఖచ్చితంగా తెలిసినట్టు నటిస్తున్నాడు. నిజంగా అతను మీ హక్కులు గుర్తించిన రోజు అతను తన పురుషాధిక్యతను చంపుకోవలసి వస్తుంది. తన క్షహా లోకపు నీడల వేటను నిలిపివేయాల్సి వస్తుంది. అందుకే అతడు నటిస్తున్నాడు. ఆ గొడవ మనకెందుకు అంటున్నాడు. ఇక్కడే ఫెమినిజం ముందు చూపు కోల్పోయిందని నేను ఆరోపిస్తున్నాను. అతని నిర్లిప్తతను తన విజయంగా భావించి మహిళ ఆదమరచింది.
ఈ భూమి మీద పుట్టిన స్ర్తీ పురుషులు ఇరువురూ సమానమే. ఇరువురి హక్కులూ సమానమే అని చాటి చెప్పడమే ఫెమినిజం నిర్దేశిత లక్ష్యమైతే ఆ మూలంలోనే తప్పుందని భావించాలి. ఎందుకు ? మీ ఇంట్లో పుట్టి పెరిగిన ఆడపిల్లను మీరెంత చక్కగా రక్షిస్తారో చెప్పండి. ఓ రాజకుమారిలా పెంచండి. చుట్టూ వున్న సమాజం తనను చక్కటి పువ్వులా ఎలా చూసుకుంటుందో చెప్పండి. కానీ మీరలా చేయడం లేదు. చేయరు. పుట్టుక నుంచి తనకు సమాజంలోని అసమానతల గురించి బోధిస్తారు. పురుషాధిక్య సమాజంలో ఎలా ఒదిగి వుండాలో నేర్పిస్తారు. అనేక నిర్భంధాలను ఎదుర్కొన్న మీరు మీ ఆడపిల్లను ఆ నిర్భంధాలకు లోబడి ఎలా బ్రతకాలో నేర్పుతారు. ఫలితం, ఏదో ఒకరోజు ఓ మగాడు తన పురుషాధిక్యతను నిర్లజ్జగా ప్రదర్శించినప్పుడు దానిని ఎదుర్కొనే కనీస జ్ఞానం, తెలివితేటలు ఆడపిల్లకు లేకుండా పోతున్నాయి. సమన్యాయం, నిషా్పక్షికత, అవగాహనలతో పాటుగా సమానత్వం అంటే ఏమిటన్న దానిపై విస్రృత కోణ దృష్టి వుండాల్సిన అవసరం ఎంతైనా వుంది. ఎందుకంటే మనం మనుషులను దేశాల ఆధారంగా, భాషల ఆధారంగా, రంగు ఆధారంగా విడగొట్టడాన్ని ఆపగలం. కానీ, ప్రకృతి మనకోసం అభివృద్ది చేసిన రెండు అంగాల మధ్య వున్న తేడాను తుడిచి పెట్టలేము. స్ర్తీ పురుషుల మధ్య ఆ తేడానే లేకపోతే ఈ భూమి మీద జీవితం ఎంతో నిస్సారంగా వుండేది. అన్ని హదు్దలను చెరిపేయగలిగినా ఈ సరిహద్దును మాత్రం మనం చెరపలేదు. ఆ తేడాలే లేకపోతే అసలీ లింగ వివక్ష, అహంకారాలు ఈ భూమి మీద వుండవు.
స్వేచ్ఛాయుతమైన, సమానత్వపు పోరాటాన్ని నిర్వహించే వారి (ఫెమినిస్టు) తెలివి తేటలను కానీ, వారి ఉద్దేశాలను కానీ నేను ప్రశ్నించదలుచుకోలేదు. అలాగే వారు ఈ రోజు వరకు హక్కుల పోరాటాన్ని నడిపిన తీరును అభినందించలేక పోతున్నాను. స్ర్తీ పురుషులు ఒక్కటే అనే భ్రమలో జీవిస్తున్నట్టయితే ఇకనైనా మేలుకోండి. మీరు ఒక్కటి కాలేదు. కాలేరు. వారు మిమ్మల్ని వేరు చేశారు. బస్సుల్లో సీట్ల మధ్య హద్దులు ఏర్పరిచారు. తాళ్ళను కట్టారు. ఇకనైనా అన్నీ సాధించామన్న కలలను వదలి వాస్తవాలను స్వీకరించండి. మీరు ఎక్కడికి నెట్టబడుతున్నారో గ్రహించండి. స్ర్తీ పురుషులు ఒక్కటి కాలేరన్న వాస్తవాన్ని గ్రహించండి. మీకు కావలసింది బస్సులో విభజన రేఖలు కాదు. మీకు కావలసింది మిమ్మల్ని ఒకరు ప్రత్యేకంగా గుర్తించడం కాదు, మిమ్మల్ని వేరుగా చూడడం కాదు. మీకు కావలసింది మీరు సమాజంలో ఒకరుగా కలసిపోవడం. దానికోసం కొత్త గొంతులకు ఊపిరులు పోయండి. కొత్త ఆలోచనలకు రూపమివ్వండి. కొత్త శక్తితో ఉద్యమించండి. అంతే కాదు సుఖమయమైన జీవితాన్ని అందించి మీ రెక్కలను పనికి రాకుండా చేసే చెట్టు కొమ్మలు మీకవసరం లేదని గ్రహించండి.